دانا محەمەد ڕەزا17/2/2021 234 جار بینراوە

بۆچی نابو بڕیارەکەی دادگای هەولێر توشی شۆکمان بکات ؟

 

من وەک خودی خۆم هیچ شۆک نەبووم بەوبڕیارەی دادگای هەولێر، کە سزای شەش ساڵ زیندانی بەسەر پێنچ ڕۆژ نامەنوس و چالاکوانی مەدەنیدا سەپاند، لەمێژە پێم وایە نابێت هیچ شتێکی دەسەڵاتی کوردی توشی شۆکمان بکات، چونکە لەدیدی بەندەوە ئەوگروپەی ئەمڕۆ ڕێبەرایەتی هەرێمی کوردستان دەکەن، تەنها کاری ناڕەواو خراپەکاریان لێ دەوەشێتەوە، نەک کاری باش و ڕەوا ، ئەی مەگەر هەموان ڕۆژانە کۆک نین لەسەر ئەوەی یاسا لەم هەرێمەی ئێمەدا سەروەرنیە، ئەی ڕۆژانە هەموان باسی ئەوەناکەین دادگاکان سەربەخۆنین و هەژمون و هەیمەنەی حزبی بەسەریاندا زاڵە، ئەی هەموان باسی ئەوەناکەین نادادی و زوڵم و ستەم گەیشتۆتە لوتکە، کەواتە کاتێک یاسا سەروەرنەبو، کاتێک دادگاکان هەیمەنەو هەژمونی حزبی و سیاسی بەسەریاندا زاڵبوو، کاتێک دەسەڵاتی داد وەری لەژێر کاریگەری دەسەڵاتی حزبی و خێزانەسیاسیەکاندابێت، کاتێک زوڵم و ستەم و نادادی بگاتە لوتکە، ئەوا هەردەبێت چاوەڕێی بڕیارێکی ئاوا ناداد پەروەرانەبین نەک بەپێچەوانەوە .

 

بڕیارێکی لەوشێوەیە لەوڵاتێکی دیموکراسی و پێشکەوتودا مایەی شۆک و سەیرو سەمەرەدەبێت، نەک لەژێر دەسەڵاتێکی دواکەوتوی دیکتاتۆرو و خێڵەکیدا ، ئاخر داد وەری حزبی و دادگای دەسەڵات، هەر بەدڵی حزبو هەر لەبەرژەوەندی دەسەڵات بڕیار دەردەکات، نابێ چاوەڕێی ئەوەی لێ بکەین بەدڵی ئازادی خوازان و لەبەرژەوەندی ماف خوراوان بڕیاربدات، یان دروستربلێم نابێت چاوەڕێی ئەوەی لێ بکەیت سەربەخۆیانە مامەڵە لەتەک کەیسەکان بکات و بڕیاری داد پەروەرانەبدات، کەواتە ئەوەی ڕوی دا چاوەڕوان کراو بو ،نەک چاوەڕوان نەکراو، هەرشتێکیش چاوەڕوانکراوبێت نابێت شۆکمان بکات.

 

لەکۆتایدا هەر ئەوەندە ئەڵێم ئەگەر ئەمڕۆ دادگای دەسەڵات لەسەر گروپ چات و ڕەخنەگرتن و نوسینی کۆمێنت و ئاڵوگۆڕی زانیاری ڕۆژنامەوانی سزای شەش ساڵ زیندانی بەسەر کۆمەڵێک چالاکواندا بسەپێنێت، ئەی دەبێت سبەی دادگای گەل سزای چەن ساڵ زیندانی بەسەر نۆکەرانی دوژمنان و نەوت دزان و تاڵانچی و گەندەڵکاران و ستەم کاران بسەپێنێت؟ ئەگەر ئەمڕۆ دادگای دەسەڵات سزای شەش ساڵ زیدانی بەسەر کۆمەڵێک ڕۆژنامەنوس و چالاکوانی مەدەنیدا بسەپێنێت لەسەرئەوەی تەنها نیازی خۆپیشاندانیان هەبووە، ئەی دەبێت سبەی دادگای گەل سزای چەند ساڵ زیندانی بەسەر بکوژانی خۆپیشاندەران و ڕۆژنامەنوساندا بسەپێنێت؟ سزای هەوڵدان بۆ خۆپیشاندان ئاوابێ، ئەی دەبێت سزای کوشتنی خۆپیشاندەران چۆنبێت؟ گەلۆ جیاوازیەکە ئێگجار زۆرە ،،
ماوەتەوە بڵێین کورد جوانی گوتووە کەدەڵێت هەموشتێک لەباریکیدا دەپچڕێت، تەنها زوڵم و زۆر داری نەبێت لە ئەستوریدا دەپسێت، بەئازادی خوازان و زوڵم لێکراوان و کەس و کاری سەربەرزی ئەوچالاک وان و ڕۆژنامەنوسانەش دەڵێین خۆڕاگرو بەردەوامبن، داد پەروەری و ئازادی نزیکە، دڵنیابن دادگای دەسەڵات کاتیە و تاسەر بەردەوام نابێت، ئەوەی کاتی نیەو بۆهەمیشە دەمێنێتەوە دادگای گەلە، دادگای ئازادی خوازانە ، دادگای زوڵم لێکراوانە .

 

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure