دانا محەمەد ڕەزا31/1/2021 334 جار بینراوە

بۆئەندامانی هاوپەیمانی هیوا

 

سەرەتا پیرۆزبایی ڕاگەیاندنی هاوپەیمانی هیوا و کاری پێکەوەیتان لێ دەکەم، هیوای سەرکەوتن و بەردەوامیتان بۆ دەخوازم، تکاکارم هەمیشە یەک هەڵوێست و یەکگرتوبن تادەسەڵات نەتوانێ پەرش و بڵاوتان بکاتەوە، چونکە دەسەڵات لەدەرفەت دەگەڕێت درز بخاتە نێوانتانەوە .


بەڕێزان وەک ئاگادارن وابڕیارە سبەی ڕۆژی شەممە وەفدی دانوستانکاری هەرێم جارێکی تر بەمەبەستی گفتوگۆ سەردانی بەغدا بکاتەوە، لای هەموانیش ڕون و ئاشکرایە کۆبونەوەو گفتوگۆکان هیچ دەرئەنجامێکی ئیجابی نابێ و دیسانەوە بەدەستی بەتاڵ دەگەڕێنەوە هەرێمی کوردستان، چونکە ئەو وەفدە بەمەبەستی ڕێکەوتن سەردانی بەغدا ناکەن تابەدەستی پڕەوە بگەڕێنەوە هەرێم، بەڵکو تەنها بۆ کات کوشتن و چەواشەکردنی خەڵکی ناڕازی هەرێمی کوردستان و ئەو وڵاتانەیە کە بەوردی چاودێری دۆخەکە دەکەن، بۆیە گەڕانەوەیان بەدەستی بەتاڵ چاوەڕوانکراوە، وەدڵنیام ئێوە لەمن و لەهەموان زیاتر ئەم ڕاستیانەو بگرە زیاتریش دەزانن.. بۆیە پێشنیاز دەکەم ئێوەش بێ دودڵی و بەڕوونی و ڕاشکاوی بەحکومەتی عێراق و لیژنەی دارایی پەرلەمان بلێن ئێمە لەئێوە باشتر شاندی هەرێمەکەی خۆمان دەناسین، ئەوانە شاندێکی دزو درۆزن و ساختەچی و قاچاخچین، نەک هەر شایەنی ئەوەنین لەگەڵیان ڕێکەوتن بکرێت بەڵکو هی ئەوەنین هەرپێشوازیشیان لێ بکرێت، پێیان بلێن تکایە هیچ ڕێکەوتنێک لەگەڵ شاندی دانوسانکاری هەرێم ئەنجام مەدەن، چونکە هەرێمی کوردستان پابەند نابێ بەڕێکەوتنەکانەوە هەتا ئەگەر هاتو بۆ ماوەیەکیش پابەندبێ و نەوت ڕادەست بکات، ناگاتە چەند مانگێک پەشیمان دەبێتەوە، بەمەش جگە لەناکۆکی و دورکەوتنەوە لەنێوان هەردوو حکومەتی ناوەندو هەرێم، هاوکات خەڵکی هەرێمی کوردستان ڕوبە ڕوی قەیرانێکی تر دەبێتەوە، بە حکومەتی عێراق بلێن دەسەڵاتێک لەگەڵ گەلی خۆی ڕاستگۆنەبێ هەرگیز لەگەڵ ئێوە ڕاستگۆنابێت، دەسەڵاتێک پابەند نەبێ بەبانگەشەو دروشم و بەڵێنەکانی لەگەڵ خەڵکی خۆی، ئەوا نابێت چاوەڕێی ئەوەی لێ بکەیت پابەندبێت بەو بەڵێنانەی بەئێوەی دەدا، پێیان بلێن دەسەڵاتێک متمانەی گەلەکەی لەدەستدابێ ناکرێ و ناگونجێ ئێوە متمانەی پێبکەن..


ئومێدەوارم زەڕەیەک سڵ لەتەخوین و هەڵەبەستنی تۆمەت و هێرشی مێدیا فشۆڵەکانیان نەکەنەوە، بەڕێزان ئەندامانی هاوپەیمانی هیوا ئێوە ئەگەر نەشتوانن ژیانی خەڵکی ڕەش و ڕووتی هەرێمی کوردستانیش چاکبکەن، خۆ دەتوانن دەسەڵاتەکەی سوک و ڕسواتربــــکەن و ڕووی ڕاستەقینەیان بەتەواوەتی بۆ عێراق و دونیای دەرەوە ئاشکرابکەن کەچ دەسەڵاتێکی گەندەڵ و ستەمکارن، دەسەڵاتێکی چاوقایم و چاوچنۆک سڵ لەبرسیکردنی دەنگدەرانی ئێوە و خوشک و براکانی ئێوە نەکاتەوە لەهەرێمی کوردستان، ئێوەش هەرگیز لە بەغدا نەسڵ لەڕسواکردن و دژایەتی کردنی بکەنەوە، نەلەتەخوین و هەڵەبەستنی تۆمەت و مێدیا فشۆڵەکانیان.

 

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure