نەبەز گۆران20/1/2021 401 جار بینراوە

بەرەو بیركردنەوە بچوكەكان


_ دەسەڵاتی هەرێم (بەتایبەت سێ‌ پارتە بەژداربووەكە) لە لوتكەی گەیشتنن بە بچوككردنەوەی بیركردنەوەكان. تەواوی وزەی خۆیان خستوەتە گەڕ بۆ لێدان لە بیركردنەوەی گەورە، ئاستی بینینیان بۆ ناوخۆ و بۆ یەكتری ئەو ئاستەیە رۆژانە لە دونیای شاشەكاندا دەیبینین، كە چۆن بە شێوازێكی نزم و زمانێكی زشتەوە مامەڵە لەگەڵ یەكتری دەكەن و یەكتری هەڵدەسەنگێنن (پێدەچێت ئەمە ئاستە ڕاستەقینەكەی خۆیان بێت پیشانماندەدەن.) ئەو وەهمەی تێیكەوتوون، لە وەهمی كارەكتەری ناو ڕۆمانی (داگیركردنی تاریكی)(1) دەچێت، وەك كارەكتەرە فاشییەكەی ناو ڕۆمانەكە پێیانوایە مادام توانای ڕاوكردنی پڵنگێكی بێدەنگی ئارامیان هەیە، ئیدی توانای ڕاوكردنی نەوەی پڵنگەكەشیان هەیە! كارەكتەری پڵنگەكە هێمایە بۆ كۆمەڵگەیەك، كە كۆمەڵگەی كوردییە و سروشتەكەی لە سروشتی كارەكتەرەكە و نەوەكانییەوە نزیكە، دەسەڵات لەو وەهمەدایە بە ڕاوكردنی پڵنگە ماندوو كەنەفتەكانی ڕابردوو، وەهمێك پەڕیوەتە سەری بۆ نەوەی پڵنگەكانیش كە نەوەیەكی نوێین و سەر بە دونیایەكی نوێین، هەمان كردە دووبارە دەكاتەوە و لە ڕێگای نینۆكەكانییەوە توانای بە قەفەس كردنی ژیانیانی هەیە! وەهمی لەم جۆرەی دەسەڵاتخوازی لە رۆژهەڵاتدا چەندین جار دووبارە دەبێتەوە، بەڵام كۆتاییەكەی لە ڕۆمانی(99 موورووی پەرشوبڵاو)(2) دەچێت و هەركە تەزبیحەكە پچڕا هەر موورووێكی دەكەوێتە قوژبنێكەوە. بێگومان لە نیگاكردنێكی خێرا بە كۆی سیستەمی دەسەڵاتەكەدا و ئەو زمانە نزمەی لە دونیای شاشەكاندا بەرامبەر یەكتری بەكاری دەهێنن، لەوە تێدەگەین وەهمەكانیان چەند گەورەبوون و بیركردنەوەكانیان چەند بچوك بوونەتەوە. (( لەوەش ریاونەتەوە وشەی سەنگین كاریان تێبكات.))


_ حیزبە ئیسلامییەكان بوونەتە مشەخۆری ناو سیستەمی دەسەڵات، ئەركی ئەم تایپە لە حیزب زۆر بە باشی روونبووەتەوە، لەناو سیستەمدا وەك مشەخۆرێك خۆیانی پێدەژیەنن و لە دەرەوەی سیستەمەكەش گوتارێكی فەوزەوی پڕ هاژەهاژیان هەڵگرتووە بۆ دروستكردنی حەشاماتێك، كە هیچ كات وێنەكانی لا روون نین. كێشەی ئەم تایپە لە حیزبی ئیسلامی تەنها ئەوەنییە كۆمەڵێك واعیزی شاشەیی بەرهەمبهێنێت بۆ شێواندنی ماهیەتی ئایین، بەڵكو كێشەكەی لەوەدایە جۆرێك لە كارەكتەر دروستدەكات هەزار سیمای هەیە، لە لایەك خۆراكەكەی لە دەسەڵات و سیستەمەوە وەردەگرێت و هیچ پرسیارێك لەسەر بەرخۆری و وەرگرتنەكەی خۆی ناكات، لە لایەك لە رێگای دەنگە دەنگەرەكانییەوە جۆشی خوارەوەی خۆی دەدات دور بكەونەوە لە هەموو خراپ خواردنێكی لادەر، بەڵام ئاستی سەركردایەتییەكەی و تەواوی واعیزە سیاسییەكانی چنگیان لە خۆراكە (بەقەولی خۆیان حەرامەكە)و لادەرەكەی ناو دەسەڵات گیركردوە و ماڵ و منداڵەكانی خۆیانی پێ گەورە دەكەن و، لە تەنیشت ئەم فرە رووییەی خۆیانەوە، ئاینیان كردوە بە كەرەستەی خزمەتكردن بە ماڵ و منداڵەكانیان و كۆمەڵێك كارەكتەری خۆپەرست و دەسەڵات پەرستیان ڕژاندوە بەسەر كۆمەڵگەدا، لە هەوڵیشدان سیمای ئایینیش وەك سیمای خۆیان لێبكەن، ئەگەر پێیانبكرێت. (بێگومان بەرهەمی ئەم تاپیە نەك بیركردنەوەی بچوكە، بەڵكو ئیشكردنە لەسەر گوتاری فریودەرانە بۆ خزمەتی خۆیان و دروستكردنی مرۆڤێكی لاوازی چڵێسە چۆن لە ڕێگەی دینەوە دەستی بگات بە خەزێنەكەی دەسەڵات.)


_حیزبە بچوكەكان، مەبەست باقی هەموویانە، زیاتر لە بەسەرهاتێكی (خواجە نەسرەدین) دەچن.( خواجە نەسرەدین لای ماڵی خۆیان كیسەی پارەكەی ونكردبوو، رۆیشتبوو لای ماڵی دراوسێكەیان بۆیدەگەڕا، لێیان پرسی بۆ وادەكەی خۆ تۆ لێرە كیسەكەت ون نەكردوە، ئەویش لە وەڵامدا دەڵێت: ئاخر لای ماڵی خۆمان تاریكە و بۆم نادۆزرێتەوە، بۆیە لەبەردەم ڕوناكی چرای ماڵە دراوسێكەماندا بۆی دەگەڕێم.) حیزبە بچوكەكان تەواوی پڕۆژە و هێزی خۆیان بەستووە بە دەسەڵاتەوە، بۆیە كاتێك لە ناو دەسەڵاتدا بۆخۆیان دەگەڕێن ئیدی بەشێكی زۆر لە كۆمەڵگە لەوە تێدەگەن لە بونیادەوە بیركردنەوەكەیان بچوك و پوچ بووە، چونكە نەیانتوانیوە دەست بۆ ڕەگوڕیشەی كێشەكان ببەن و توانای بیركردنەوەیان لاوازبووە بۆیە تەنها لەناو دەسەڵاتدا هەست بە بوونی خۆیان دەكەن، هەر ئەم كورت بیركردنەوەیە وای لێكردوون لە شوێنێكدا بۆ جەوهەری خۆیان بگەڕێت، كە شوێنەكە بوونی ئەوان وێران دەكات، لە كاتێكدا ئەوەی ئەوانی بە زیندویەتی دەهێشتەوە ئەو شوێنە نەبوو ناوی دەسەڵاتە. لەگەڵ ئەمەشدا ئەو كارەكتەرەی دروستیانكردوە هیچ جیاوازی نییە لەگەڵ كارەكتەری حیزبەكانی دیكەدا، بەڵكو سەر بەیەك میراسن و هێز و توانای خۆیان گرێدەدەن بەوەوە چۆن بگەنە دەسەڵات، نەك چۆن مرۆڤێكی هوشیاربن بە بوونی خۆییان و كۆمەڵگەكەیان و لە رووبەرێكی جیاوازەوە دونیابینی نوێ‌ بەرهەمبهێنن، بۆ ئەوەی زیاتر تێبگەن لە ناو چ دونیایەكی بچوكدان پێویستە سەر لەنوێ‌ وانەی كێشە بونیادییەكانیان بۆ بخرێتەوە بەرچاو، تا بزانن هیچ جیاوازییەكیان لەگەڵ دوو حیزبەكەی دەسەڵات نییە و كارەكتەرێك دروستدەكەن دیوی دووهەمی كارەكتەری حیزبە ئیسلامییەكانە بە تێكەڵەی كارەكتەری حیزبە دەسەڵاتدارەكان، ئەم كتێبەیان پێشكەش دەكەین وەك وانەی یەكەم بیخوێنن تا تێبگەن لەوەی مرۆڤی نوێ‌ چۆن دروستدەكرێت‌.(پرسی كەسایەتی لە كوردستان.)(3)


_بۆ هەڵای دروستكردنی هەرێمی سلێمانی وەك هاوڵاتییەك لەوانەیە پێویستم بەوە نەبێت مێشكم بگوشم تا بیری لێبكەمەوە، هەوڵدەدەم بە نوكتەیەك نیگایەكی تێبگرم: ((پیاوێكی لای ئێمە لە تەمەنی شەست ساڵیدا بڕوای بەوە هێنابوو خودایەك هەیە و دەبێت بیپەرستیت، دوای ئەوە وتبووی با بچم بۆ مزگەوت بزانم ئەم خەڵكە بۆچی ڕۆژانی هەینی دەچن دادەنیشن و یەكێكیش قسەیان بۆ دەكات، كە ڕۆیشتبوو مەلای مزگەوتەكە باسی ئەوەی كردبوو شەریك بۆ خودا پەیدا دەكرێت، ئەمیش هەڵسابووییەوە وتبووی: ئەوە تۆ باسی چیدەكەیت، من تازە بە تازە بڕوام بە یەك دانە هێناوە، ئێستا تۆ بەتەمای شەریكێكیشی بۆ پەیدابكەم و بیكەم بە دووان، چۆن شتی وا دەكەم.)) ئێمەش تازە بە تازە خەریكە بڕوا بەوە دەهێنین هەرێمێكمان هەیە، هەندێك دۆست بەتەمان شەریكێكی بۆ پەیدا بكەن و بیكەن بە دووان، ئەمە زیندووكردنەوەی بیركردنەوەی میرنشینەكانە و (شەرفخانی بەدلیسی)(4) زۆر بەباشی رەگوڕیشەی ئەو بیركردنەوەی بۆ رونكردوینەتەوە و تێیگەیاندووین ئەو بیركردنەوە بچوكانە، چ گورزێكی كوشەندەیان لە چارەنووسی كۆمەڵگەی كوردی داوە.


_بێگومان باسی ئەو جیهانە ساختەیە ناكەین لە دونیای شاشەكانەوە رۆژانە بەریدەكەوین و پڕە لە بیركردنەوەی بچوك، بەڵام ئەم چەند خاڵە سەرەتاییە دەخەینە روو بۆ ئەوەی پرسیار لە دەسەڵات، حیزبەكان، خۆمان بكەین بۆچی بەرەو جیهانی بیركردنەوە بچوكەكان هەنگاو دەنێین؟ بۆچی مرۆڤی نوێ‌ دروست ناكرێت و لەبری ئەوە بیركردنەوەی بچوك و كارەكتەری خۆپەرست و چڵێس بە خەزێنەی دەسەڵات رۆژانە لە برەودایە؟


((تەنها مرۆڤێكی هوشیار بە مێژووی خۆی، بوونی خۆی، كلتوور و بنەوانی ئایدیاكانی خۆی، زمانی خۆی، دەتوانێت دونیایەكی گەورە و بیركردنەوەی گەورە و سیستەمێكی تەندروست بەرهەمبهێنێت.))


پەراوێزەكان:
_(1)_ بگەڕێوە بۆ خوێندنەوەی ڕۆمانی: داگیركردنی تاریكی، بەختیار عەلی.
_(2)_ بگەڕێوە بۆ خوێندنەوەی ڕۆمانی: 99 موورووی پەرشوبڵاوی، حەلیم یوسف.
_(3)_ بگەڕێوە بۆ خوێندنەوەی كتێبی، پرسی كەسایەتی لە كوردستان. عەبدوڵا ئۆجەلان.
_(4) بگەڕێوە بۆ خوێندنەوەی كتیبی، شەرەفنامە، میر شەرەفخانی بە دلیسی.

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure