ئاوات کۆکەیی11/10/2020 519 جار بینراوە

لە کتێبی ( لەبری بیرەوەری)دا چیم خوێندەوە

 

لە بەرگ بۆ بەرگ هەموویم خوێندەوە، وەک سروشتی ئاسایی خۆشم ( یان وەک زۆر خوێنەری دیکە)، هەر لەسەرەتاوە دەفتەرو قەڵەمێکم لەتەنیشت کتێبەکەوە دانا تا سەرنج و پرسیارەکانمی تێدا تۆماربکەم، لە ئەنجامدا ئەوەندە سەرنج و پرسیاری تێکەوت، ئەوەندە خاڵی ناکۆک و شایستە بەهەڵوەستەی تێکەوەت، نیوەی زیاتری دەفتەرەکەم پڕکردەوە.


ئەگەر بمەوێ، یان راستتر بڵێم گەر لەبەر ئیلتیزامی حزبیم نەبێ کە بەڕێز کاک مەلابەختیار ( نووسەری کتێبی لەبری بیرەوەری) سەرکردەیەکی دیارو کاریگەر، دێرین و بەردەوامی یەکێتیی نیشتمانیی کوردستانە و منیش ئەندامێکی ئاسایی ئەو حزبەم، ئەوا بەخۆمدا رادەپەڕمووم بە کتێبێک یان بەنامیلکەیەک سەرنج و رەخنەکانم بخەمەڕوو ، چونکە لە راستیدا کتێبەکەی کاک مەلا بەختیار هەڵذەگڕێ زۆری لەبارەوە بنووسرێ لە ( سەرنج، رەخنە، وەڵام و ... هتد).


بۆیە من باز بەسەر هەموو ئەوانەدا دەدەم کە تۆمارم کردوون، بەڵام دەیانپارێزم، تەنها قسە لە بارەی یەک خاڵی کتێبەکەوە دەکەم کە لە دڵەوە بێتاقەتی کردم، ئەوەیش تانە دانە لە چەند شەهیدێک، چونکە شەهید هیڵی سوورە، بۆ هیچ کەسێک نییە ئەو هیڵە ببەزێنێت، مەگەر دووژمن!


یەکەم:
ئەو نامەیەی لە لاپەڕە 537ی کتێبەکەیدا بڵاوی کردۆتەوە، بەشێکی قسەوتنە بە شەهید حەمەڕەشی پارتیزان، حەمەڕەش پیاوی تەنگانەو دڵسۆزی خاک و گەل، داهێنەری گرتنی رەبایەی سوپای (فاشییەکان)، پارتیزان و فەرماندە... هەروەها شێخزادە و خاوەن بنەماڵەو ناوبانگ، هەر دانیشتبایەو سیاسەتی نەکردایە ئەوەی بەس بوو تا ژیانێکی ئارام و تەسەلی هەبێت، بەڵام بۆ کوردو کوردایەتی چووە ئەشکەوت و پەناوپەسێران و نانەڕەقەی کەڕوولێدراوی دەخوارد، لێ بەوەش نەوەستا، خۆی کردە قوربانی و لە نەبەردییەکدا دژی سوپای (فاشییەکان) و نۆکەرەکانی، گیانی خۆی بەخشی.


حەمەڕەشێک کە ئەمە مشتێک بێت لە خەرواری خۆنەویستی و دنیا نەویستیی و ... هتد، کاک مەلا بەختیار دێت بەبێئاگایی و لەبەر رۆشنایی زانیاری کەسانی تردا، قسەی وا دەربارەی دەکات کە رێگە بەخۆم نادەم (وەک قسەی کەسێکی دیکەش) بیاننووسمەوە!


ئەگەرچی کاک مەلا بەختیار دوای بڵاو بوونەوەی کتێبەکەی و بیستنەوەی گلەیی و گازاندەکان و شتی تریش، لە بارەی نامەکەوە روونکردنەوەی داو خوڵاسەی کەلام رەتی ئەو تۆمەتەی کردەوە کە دابوویە پاڵ شەهید حەمەڕەش و داوای لێبووردن دەکات و دەشڵێت( لە مەراسیمی کتێبەکەدا چیم لەسەر حەمەڕەش وتووە... ئەوەی وتوومە باوەڕی منە، نەک چی لەنامەکەدایە.
مەبەستی کاک مەلا بەختیار ئەو کتێبەیە کە ساڵی 2018 بەناوی (حەمەڕەش گەرمیانییەکی گڕگرتوو) بڵاوکرایەوە و لە پێشەکییەکەیدا
کە بەڕێزی نووسیویەتی لە ( لاپەڕە 11)دا دەڵێت: ( شەهید حەمەڕەش، قارەمانێکی دیاری کوردایەتی و یەکێتی بوو، کەسێکی راستگۆی بۆتەی خەبات و کۆڵنەدەری رۆژگاری سەخت بوو) هەر لەو پێشەکییەدا زۆر رستەو دەستەواژەی دیکەی جوان و شایستە بە ژیان و خەباتی ئەو شەهیدەی، نووسیوە.


کورد دەڵێت ( چاکی مەکە با خراپتر نەبێت)، ئەی ئەگەر لە ساڵی 2018 دا ئەوە باوەڕی بەڕێزی بووە لە بارەی شەهید حەمەڕەشەوە، ئەی بۆ دووساڵ دواتر نامەیەکی ئاوا بڵاودەکاتەوە؟ ئەگەر وەک دیکۆمینتێکیش بەلایەوە گرنگ بووەو هەر دەبوو بڵاوی بکاتەوە، دەکرا بەهێڵیکی پانی رەنگی رەش، ناوی شەهید حەمەڕەش بشارێتەوە، چونکە بەپێی قسەی خۆی گەیشتۆتە ئەو باوەڕەی کە ئەوانە تۆمەتن و راستنین، بۆیە پێوسیت بوو ناوی ئەو شەهیدە بشارێتەوەو بەو کارەش هیچ لە گرنگیی ناوەرۆکی نامەکە کەم نەدەبۆوە، گومانێکیش کەمتر دەچووە سەر کتێبەکەی.

 


دووەم:


پێم سەیرە کاک مەلا بەختیار چۆن دڵی هاتووە ئاوا باسی شەهیدان ( خەلیل و هاوار) بکات، خۆ ئەو بەقەدەر ساڵانی تەمەنی خۆی کارەساتی شەهیدبوونی پێشمەرگەی بینیوەو لە زۆرکەس زیاتر هەست بە کسپەی دەروونی پێشمەرگەیەک دەکات کە بە تیری دوژمن دەپێکرێ و رەنگی بەرگی لەخوێندا ئەرخەوانی دەبێت و دواجار نوزەی لێدەبڕێت و خۆی لەپێناوی خەڵک و خاکەکەیدا، دەکاتە قوربانی؟!


شەهید خەلیل جەلال ساڵی 1945 لە دایک بووە، ساڵی 1972 بۆتە کۆمەڵە، پێشمەرگەی شۆڕشی ئەیلول بووە، ساڵی 1975 لە لایەن پیاوانی بەعسەوە دەستگیرکراوە، بەرگەی ئەشکەنجەی گرتووەو لە زیندان هەڵآتووە، ساڵی 1976 بۆتە پێشمەرگە، ساڵی 1981 بە هاوانی بەعس شەهید بووە،


شەهید هاوار جەلال ساڵی 1955 لەدایکبووە، ساڵی 1973 بووە بە کۆمەڵە، پێشمەرگەی شۆڕشی ئەیلول بووە، مانگی 2ی 1977 لە هەوڵێکی بەعس بۆگرتنی دەربازی دەبێت و دوای دوو رۆژ دەبێتە پێسمەرگە، لە 10- 7-1982 دەکەوێتە تەوقی هێزی دووژمنەوە، بەرامبەر نزیکەی 200 جاش و سەرباز بۆ ماوەی نیو سەعات دەجەنگێ، دەپێکرێ و دەبێتە شەهیدی ئەم کوردستانە، جاشەکان ئەوەندە لێی بەداخ بوون تەرمەکەی دەشێوێنن و بەبەرد سەری پان دەکەنەوە.


ئەم دوو شەهید برای بەڕێز مامۆستا ئیبراهیم جەلالن، ئاشکراشە مامۆستا و کاک مەلا بەختیار ناکۆکیی لە مێژینەیان هەیە، بۆیە کاک مەلا بەختیار لە کتێبی ( لەبری بیرەوەری) کە وەڵامی کتێبەکەی مامۆستا ئیبراهیم جەلال (چەپکێک لە مێژووی کۆمەڵە) دەداتەوە، تووڕەبوونێکی بێڕادەی پێوە دیارەو کار دەگاتە ئەوەی قسەی وا بە مامۆستا ئیبرایم جەلال دەڵێت کە لە ئاستی کەسێتی کاک بەختیارەوە دوورە، پێی دەڵێت: (سوک، ترسنۆک، گەماڵ). لاپەڕە 114-115.


ئەمە بەهەر حاڵ و کێشەی نێوان ئەو بەڕێزانە خۆیانە، هەرچەندە یەکێتی و شۆڕشی نوێ و ئێمەشی پێ خەوشدار دەبین، چار چییە هەر دەبێ بڵێین قەینا، بەڵام ئەوەی جێی سەر سووڕمانی خوێنەرو خاڵی نەنگییە بۆ کاک مەلا بەختیار، ئەو دوو شەهیدەشی بە ئاگری ناکۆکی نێوان خۆی و مامۆستا ئیبراهیم جەلالەوە سوتاندووە.


کاک مەلا بەختیار لە لاپەڕە 176-177 باسی دەمەقاڵێی پێشمەرگەیەکی خۆی (یەکێتی) و پۆلێک پێشمەرگەی (بزووتنەوە- حسک) دەکات و دەڵێت چاوم لێی بوو لێیاندا، چووم نەهێڵم لێی بدەن، بوو بەناخۆشی میلیان راکێشا، نووسەر و هەردوو براکەی (مەبەستی مامۆستا ئیبراهیم جەلال و شەهیدان هاوارو خەلیلە) نەیانوێرا یەک هەنگاو بێنە پێشەوە ( مەبەستی ئەوەیە بەهانایەوە نەچوون).
شەهیدان هاوارو خەلیل دوو داماوی بێ پەیوەندی بەکێشە سیاسییەکان و دوور لە ناکۆییەکان بوون، کاک مەلا بەختیار لە بازنە گشتییە سیاسییەکەو پێشمەرگایەتییەکەدا سەرکردەو لێپرسرواوی ئەوانیش بووە، دەشزانێ شەهیدی دەستی بەعسن، قاڵبووی دوو شۆڕش و پەروەردەی ئاکارجوان و رۆشنبیرییەکەی کۆمەڵە و راهێنراوی (کەسێتی بەهێز و ئازا)ی بەرهەمی ئەو رێکخراوە بێوێنەیەبوون، ئیتر سەیرە، چۆن دڵی هاتووە، بەترسنۆک ناویان بەرێت؟


لە کاتێکدا شەڕەبۆکس بووەو نەگەیشتۆتە تەقە، ئەوان پێشمەرگەی سەرەتای شۆڕش بوون ئەگەر ترسنۆک بوونایە بەرگەی ئەو هەموو ساڵە سەختانەی سەرەتای شۆڕشی نوێیان نەدەگرت و وەک خەڵکی تر دوای چەند رۆژێک، چەند مانگێک و ئەو پەڕی ساڵێک دەبەزین و تەسلیم دەبوونەوە، یان دادەنیشتن.


نەخێر شەهید ترسنۆک نییە، شەهید هاوار لە دوا شەڕی و لە شەهیدبوونەکەیدا ئەوەندە ئازابووە تا بۆی کراوە بەرامبەر ئەو هێزە زۆرەی دوژمن شەڕی کردووە، دەبێ ئەو پێشمەرگەیەی کۆمەڵە هێزەکەی بەعسی تەواو شپرزەو تەنگەتاو کردبێت و زەبری باشی لێدابن کە ئاوا هەر بە شەهیدبوونی دڵیان ئاو ناخواتەوە، تەرمەکەی دەشێوێنن و بە بەرد وا سەری پان دەکەنەوە نەناسرێتەوە.


ئەزموون پێماندەڵێت ئەو رق و کارادانەوەیە بەرامبەر مرۆڤی ئازا دەکرێت، سمکۆی شکاک کە شەهیدکرا، دوژمن سوکایەتیی بە تەرمەکەی کردو لە خیابانان پیشانی خەڵکیان دەداو عەکسیان دەکێشا تا وەک بەڵگەی لەکۆڵبوونە پیشانی کاربەدستانی ئێرانی بدەن، دووژمن بۆ ئەوەی دڵی ئاوبخواتەوە شەهید قازی محەمەدی چەندین رۆژ بەدارەوە هێشتەوە، چێگیڤارا تەرمەکەی داوو ودەرمانکرا تا زوو نەڕزێت و لەسەر مێزێکی بەرز لەناوهۆڵێکدا ماوەیەکی زۆر نمایشکرا، تەرمەکەی شەهید سەڵاحی رەحمە لەناو شاری سلێمانیدا لە دوای ئۆتۆمێلی قواتخاسەخراو راکێشرا تا جەستەی هەپروون بە هەپروون بوو... دەیان رۆڵەی ئازای دیکەی ئەم شۆڕشە نوێیەی کە بەڕێزیان یەکێک لەسەکردە کاراکانی بوون، سوکایەتی بە تەرمی پیرۆزیان کراوە.
شەهید هاواریش یەکێکە لەوانە، بەمردوویش باجی ئازایەتییەکەی دا.

 


بەڕێز کاک مەلا بەختیار، دواقسەم ئەوەیە گریمان هەردوو شەهید هاوارو خەلیل لەو شەڕە بۆکس و میل راکێشانەدا ترساون ( کە باوەڕناکرێت نە ئەوان و نە مامۆستای برایان ترسابن)، دەی هەر بەخاتری ئەوەی هەردووکیان پێشمەرگەی سەرەتای شۆڕش و شەهیدی راستەقینەی دەستی بەعسن، ئاوا ناویانت نەهێنایە، چونکە ئاماژەدان بە ئەوان زیادەیەو پێویست ناکات، خۆ رستەکەت هیچی لێکەم نەدەبۆوە کە بەتەنیا ناوی مامۆستا ئیبراهیم جەلات بهێنایە، تا ئێمەش باوەڕ بەوە نەکەین کە تووڕەبوونت لە مامۆستا ئیبراهیم جەلال، پاڵپێوەنەری زۆر شتە، زۆر شت.

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure