فایەق فارس (سەرچناری)14/4/2020 768 جار بینراوە

(ئەنفال لەنێوان بەرداشی دێوەزمەکانی دوێنێ و مشەخۆرەکانی ئەمڕۆدا) (Anfal)

 

دێوەزمەکانی بەعس لەساڵی ١٩٨٨ کاتێ بڕیاری پرۆسەی ئەنفالیان لە کوردوستان و بەتایبەتیش گەرمیان دا، جگە لەناسنامەی چەپەڵی مرۆڤایەتی هیچی تریان پێنەبوو، بەڵام لەناوەڕۆکدا مرۆڤ نەبون ئەوان داماڵراو لەڕەوشت ومرۆڤایەتی و هەموو بەهاکانی مرۆڤ بوون. داماڵراو لە ئاین و ویژدان. وە ئەوانەشی کە بڕیارەکەیان جێبەجێ کرد هیچیان کەمتر نەبوون لەیەکتری و هاوتای تاوانی قڕکردنی گەلێك بوون لەمێژووی مرۆڤایەتیدا.

 

بەداخەوە زۆربەیان ئەوانەبون کە چەندین مەدالیای خۆفرۆشیان وەرگرت لەسەر هێنانەوەی کەلەسەری کورد بۆ ئەمنەکان و هەر ئەوانەش بون لەپرۆسەی ئەنفالدا تفەنگەکانیان لەسەرسەری ژنان و کچانی گەرمیان دائەنا، لەجێی ئەوەش جگە لەوەرگرتنی کەمێ پارەو دەستخۆشی زیاتر هیچ پاداشتێکی تریان پێ نەئەدرا.کە بەئێستاشەوە زۆربەیان لەسایەی حیزبی کوردیدا جێی ڕێزن و بگرە دەسەڵاتیشیان هەیەو بڕیاردەرن.

 

لەم یادە پڕ ئازارەدا دەسەڵاتدارانی کورد تەنها ساڵانە هەر حیزبێك و بەژمارەیەك بەرپرس بەکۆمەڵێ وتاری لەیەکچوو و لەپێشەوەی کورسیەکانی یادەکەدا دائەنیشن وکۆمەڵێ فرمێسکی درۆ ئەڕێژن بۆ کەس وکاریان، کەئازارەکانیش تەنها بەر کەسوکارو خانەوادە بەجێماوەکانیان کەوتووە و وەك پێویست دەسەڵاتی کوردی نەیتوانیوە لەو ئێش وئازارەیان کەمکاتەوە و دڵنەواییان بکات، بەبێ ئەوەی هەر کەمێك بیریان لەوە کردبێتەوە کە چۆن بتوانن ببنە تۆزێك سوکنایی بۆ خانەوادەکانیان و هەوڵ بدرێ خزمەتیان بکەن.

 

پرسییار ئەوەیە ئایا دەسەڵاتی کوردی عیبرەتیان لەئەنفال وەرگروە؟

 

ئەکرا ئەنفال و کیمیاباران و وێران وخاپورکردنی کوردوستان ببوایەتە دەرسێك بۆ چەسپاندنی یاساو دیموکراسی و دادی کۆمەڵایەتی و سیستەمی بەڕێوەبردن و سەروەری یاسا لەهەرێمی کوردوستاندا،ئەکرا ببوایەتە دەسپێکی تەبایی و پتەوکردنی ئابوری و بنبڕکردنی تەواوی قەیرانەکان.

 

بەداخەوە نەك ئەمانە هەر نەکران، بەڵکو سیاسەتیان بەجۆرێ ناشیرینکرد کەهەر مرۆڤێك بیەوێ کەرامەتی پارێزراوبێ، لێی دورکەوێتەوە،بەجۆرێ ئازادییان پەیڕەوکرد کە هەر مرۆڤێ لەسەر ڕەخنەیەك بکوژرێ یا لەماڵەکەی خۆیدا بڕفێنرێ و لەزیندان توندکرێ، بەجۆرێ هێزیان دابەشکرد و لەشکری شەخسیان پێ دروستکردن،هەرکاتێ بەرپرسێك بیەوێ خەڵکیان پێ ئازارئەدا تا دەگاتە دەسبەسەریش. لەلایەکی تریشەوە پەیوەندیە کۆمەڵایەتیەکانیان لاوازکرد و تەواوی کۆمەڵگەیان دابەشکردوە بەسەر حیزب و گروپدا،بەبێ ئەوەی توانای بیرکردنەوەی گەل و نەتەوەو نیشتیمانیان تێدامابێ.

 

سەرانی دەسەڵاتداری کورد ڕۆژانە لێرەو لەوێ هەوڵی خیانەتی نەتەوەیی و نیشتیمانی ئەدەن و بونەتە دارشەقی دوژمنان بەبێ ئەوەی بیری نەتەوەکەی خۆیان هەبێ و سنوری جوگرافیای ئەم خاکەیان بۆ گرنگبێ. سەروەتی تەواوی کوردوستانیان لەژێردەستدایە بەبێ ئەوەی بیریان لەوە کردبێتەوە کەئاستی ئابوری خەڵکەکەی لەکوێدایە.

 

بۆ ئەوەی تەواوی خەڵك بەئازادی و یەکسانی بژی و یاسا سەروەربێ، ئەگەر هێزێکی نیشتیمانی یەكگرتومان بەلاوە مەبەستبێ،ئەگەر سیاسەتێکی حەکیمانە زەروربێ،ئەگەر بمانەوێ پەیوەندیە کۆمەڵایەتیەکان بەهێزکەینەوە، ئەگەر بمانەوێ سەروەتو سامانی کوردوستان شەفاف بێ،ئەگەر مەبەستمانبێ خاکەکەمان و نەتەوەکەمان ژێردەستە نەبن، ئەکرێ لێرەوە تاکی کورد بڕیاری خۆی بداو کوێرانە نەبنە دەروێشی حیزب و بەرپرسەکان، ئەکرێ ئیتر کاتی ئەوە هاتبێ بەم دەسەڵاتە دزو گەندەڵە بوترێ ستۆپ، ئەکرێ ئیتر نیشتیمانەکەمان بەلاوە گرنگتربێ لەبەرپرسە دزو گەندەڵەکان و هەموومان پێکەوە هەوڵی نیشتیمانێکی ئازادو گەلێکی بەختیار بدەین و ئەم هەموو خیانەتی نیشتیمانی و نەتەوەییە ببێتە دەرسێك بۆ هەموومان. کۆمەڵگە پێویستی بە ڕێکخستنەوەیەکی ڕیشەیی هەیە.

گەرمیان قوتابخانەی مێژوویی شۆڕشەکانی کوردبون.!!!

سڵاو بۆ قوربانیان.
هەزاران نەفرەت لەدوژمنان و داگیرکەران..


٢٠٢٠-٠٤-١٤

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure