رووگەش جەباری خێزانی ڕۆژنامەنوس شێروان شێروانی
282 جار بینراوە 26/2/2021 10:04 AM

خێزانی شیروان شیروانی: زانيارى له‌سه‌ر دۆخى خراپى شیروان و هاوڕێكانی ئاشكرا ده‌كات



سنور ميديا 

رووگەش جەباری خێزانی ڕۆژنامەنوس شێروان شێروانی رایگەیاندووە، لەو رۆژەوەی هاوسەر و هاوڕێكانی سزای شەش زیندانییان بەسەردا دراوە مانیان گرتووە و دۆخیان خراپە، تائێستاش تەنها یەكجار و بۆ پێنج خولەك سەردانی كردووە.


رووگەش جەباری خێزانی ڕۆژنامەنوس شێروان شێروانی بەدەنگی ئەمەریكای راگەیاندووە، هەفتەی رابردوو شێروان تەلەفونی بۆ كردوە و وتویەتی "ئێمە مانمان گرتووە لەو ڕۆژەی كە حوكم دراوین بەو شەش ساڵە لەو رۆژەوە مانمان گرتووە وادیارە كە هەموو بەیەكەوە مانیان گرتبێت ئەو پێنج كەسەی كە حوكمی شەش ساڵەكەیان بەسەردا دراوە".

 

هەروەها دەڵێت" بەڵام تائێستا نازانم ئەو لەمانگرتنەكەی بەردەوامە یان نا؟ چونكە زۆر درەنگ درەنگ دەهێڵن تەلەفون بكات ماوەی تەلەفونەكەشی پێنج خولەكە و هەندێكجار ئەگەر ببێتە 7-8 خولەكێك، واتە تائێستا 10 خولەك نەبووە ماوەی تێلفۆنەكەی".

 

خێزانی شێروان ئاماژەی بەوەكردووە "ناتوانین سەردانیان بكەین، یەكجار سەردانێكی تایبەتیان بۆ ئامادەكردین ئەو شانزە كەسەی كە لەماوەی ئەم شەش مانگەدا گیراون بۆ ماوەی 5 خولەك بوو، ئیتر سەردانی تریان بۆ ڕێك نەخستووین ئەویش نزیكەی دوو مانگ بەر لەئێستا چووم سەردانیم كرد".

 

جەباری روونیكردۆتەوە، ئەو كات شیروان لەزیندانی تاكەكەسی دەرچوو بوو، زۆر زۆر لاواز و ڕەنگ زەرد بوو و بێتاقەت دیاربوو، 68 ڕۆژ لەزیندانی تاكەكەسیدا ماونەتەوە، واتە ئەگەر دوو مانگ پێش ئێستا وابوو بێت، ئەی دەبێت ئێستا چۆن بێت؟، زۆربەی لایەنەكان و تەنانەت ڕێكخراوی نێودەوڵەتیش ئاگادار كراونەتەوە و هەڵوێستیان زۆر باشە لەگەلیماندا واتە هاوكارن لەگەڵیاندا.


ڕووگەش جەباری ئەوەشی وتووە "نزیكەی شەش مانگە شێروان گیراوە هەر یەكجار بۆ ماوەی پێنج خولەك تەنها من توانیومە بیبینم، بەڵام منداڵەكان نەیانتوانیوە، بەحوكمی ئەوەی زۆرجار لەگەڵ پارێزەردا قسە دەكەین پارێزەرەكە وتی هێشتا كێشە لەسەر حوكمەكەیان هەیە بۆیە تائێستا هەر لەئاسایشی گشتی هەولێرن تەنانەت پارێزەریش ناتوانێت بیبینێت".

 

دەربارەی دۆخی هاوسەرەكەی ڕووگەش جەباری، وتی" بێگومان ئێستا لەدۆخێكی تەندروستی نەگونجاودان، چونكە ئەوكاتەی پێش حوكمەكە ئەوان حوكمیان بەسەردا نەدرابوو كە لەڕووی مەعنەوییەوە بێتاقەت بوون، ئەی ئێستا ئەگەر حوكمیان بەسەردرابێت و ئێمەش نازانین دادگای (تەمییز- پێداچوونەوە) تا چ ڕادەیەك بێلایانانە مامەڵەمان لەگەڵدا دەكات و پێداچوونەوەیەكی باش بەسەر ئەو كەیسەدا دەكاتەوە، بۆیە دڵنیام ئێستا ئەوان هەر بێتاقەتن بەتایبەتیش لەوكاتەوەی كە مانیان گرتووە".

 

خێزانەكەی ڕۆژنامەنوس شێروان شێروانی ئاماژەی بەدۆخی منداڵەكانی كرد و وتی" مناڵەكان یەكێكیان تەمەنی 12 ساڵە و ئەوی تریان تەمەنی 8 ساڵە زۆر زۆر دۆخی مناڵەكانم لەڕووی دەروونیەوە تێكچوو لەو كاتانەی كە خەم بۆ باوكیان دەخۆم و لەسەرەتاش كە زانیم شەش ساڵ زیندانی دەكرێن، بەڵام ئێستا من هەوڵدەدەم كەمێك خۆڕاگرتر بم لەبەر خاتری مناڵەكان، بەڵام بەبەردەوامیش كچە بچووكەكەم كە نزیكەی دووساڵ و نیوە داوای باوكی دەكات".


ناوبراو باسی لەدۆخی ئابوری خێزانەكەی كرد لەدوای دەستگیركردنی هاوسەرەكەی لەو ڕوەوە وتی" بەڕاستی دەستگیركردنەكەی كاریگەری هەبووە، بەڵام لەگەڵ ئەوەشدا سوپاس بۆ خودا باشین من خۆم مامۆستام ئیتر ئەگەر مووچەكانمان بدەنێ، بەڵام بێگومان دەستگیركردنی هاوسەرەكەم كاریگەری هەیە ئەی چۆن كاریگەریی نابێت".

 

لەدوای پڕۆسەی دادگایی كردنی ئەو چالاكوان و ڕۆژنامەنوسانە لەلایەن دادگای هەولێرەوە، بەشێك لەپەرلەمانتارانی هەرێم و پارێزەرانی كەیسەكەیان ڕایانگەیاند" شێروان شێروانی لەبەردەم دادگا بەدادوەرەكەی وتووە كێ لە ئێوە قبوڵی دەكات هەڕەشەی هێنانی خێزانی لێبكەن تا دانپێدانانەكەی واژۆ بكات؟!".

 

لەوەڵامدا ڕووگەش جەباری دەڵێت" من ئێستا هیچ هەڕەشەیەكم لەسەر نییە، هیچ هەستم بەهەڕەشە نەكردووە، بەڵام تەنها لەڕێگەی پەیوەندییەكی تەلەفونی شێروان پێی وتم لەدوای دوو هەفتە دوای ئەوەی كە من چووم بۆ ماوەی پێنج خولەك بیبینم لەزیندان، شێروان تەلەفونێكی كرد و لە تەلەفونەكەدا پێی وتم كە لەزیندان چوویتە دەرەوە لەلای من هیچ هەڕەشەیەك و بێڕێزییەك دەربارەی تۆ كرا؟ منیش وتم نەخێر، پێم وت بۆچی؟ ئەویش وتی هەروا ! واتە پێی نەوتم هۆكارەكەی چییە دوای ئەوە زانیم كە لەدادگا قسەیەكی ئاوای كردبوو دیارە شتێكیان پێ وتبوو بۆئەوەی بەزۆر واژۆی پێ بكەن لەسەر ئەو ئیفادانەی لێی وەرگیراوە".

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure