سنور ميديا
157 جار بینراوە 20/2/2021 05:52 PM

هەڤاڵ ئەبوبەكر له‌سه‌ر پرسى لامه‌ركه‌زێتى سلێمانى زانيارى ورد ئاشكرا ده‌كات



سنور ميديا 

هەڤال ئەبوبەکر، پارێزگاری سلێمانی لە دیداری سلێمانی بۆ لا مەرکەزی رایگەیاند، داهاتی سلێمانی بە مەنتیق و بە ژمارە ئەگەر لێی نەبردرێ لە هەموو پارێزگاکانی تر زیاترە.

 

د. هەڤاڵ ئەبوبەكر- پارێزگاری سلێمان لەووتەیەكدا كە لەدیداری سلێمانی بۆ لامەركەزی پێشكەشی كرد ئاماژەی بەوەدا، زەمینەیەكی كارگێری، یاسایی، كۆمەڵایەتی و سیاسی بۆ لامەركەزیەت هەیە، هەرێمی كوردستان بەشێكە لەو لامەركەزیەتەی لەناو دەستووری عێراقدا جێبەجێكراوە، "ئەمەش دەیكات بە ئەمر لەسەر هەرێمی كوردستان كە پێویستە ئەویش لەسەر ئاستی یەكە كارگێڕییەكان سیستەمی لامەركەزی بەڕێوەبەرێت".

 

جەختیشی کردەوە، "قسەكە لەوە نییە ئێمە داوا بكەین حكومەتی هەرێمی كوردستان نەمێنێت، ئەوەی داوا دەكرێت داوایەكی رەوا و یاساییە، ئەزموونی 30 ساڵ و ئەزموونی دونیا ئەوەمان پێ دەڵێت، دابەشكردنی دەسەڵاتەكان لەسەر بنەمای ئەرك و بەرپرسیاریێتی، دابەشكردنی داهات و دەسەڵات بە یەكەوە، لەسەر بنچینەی ئەرك و بەرپرسیاریێتی دەتوانێت حكومەت پتەوتر بكات و بەهێزتری بكات".

 

پارێزگاری سلێمانی باس لەوەشدەكات، ئەوان جددین لەوەی دەیانەوێت سیستمی حكومرانی لە هەرێمی كوردستان وای لێبێت، چ هاوڵاتی كە دەنگ دەدات، چ یەكە كارگێڕییەكان، چ دامودەزگەكان هەست بە وجودی خۆیان لەناو پەیكەری حكومڕانیی هەرێمی كوردستاندا بكەن، هەست بكەن كە رۆڵیان هەیە، كە ئێستا ئەو رۆڵە نەماوە.

 

هەڤال ئەبوبەکر دەشڵێت، "مەنتقی تێدا نییە سلێمانی گەورەترین یەكەی ئیدارییە لە عیراقدا، 16 قەزای هەیە 2528 گوندی هەیە، 6 دەروازەی لەگەڵ ئێراندا هەیە، فرۆكەخانەی نێودەوڵەتی هەیە، گەورەترین رێژەی غاز لەو ناوچەیەیە، نەوتی تێدایە، ئەو هەموو وەبەرهێنانەی تێدایە، كەچی ئێمە پێمانوابێت داهاتی ئێرە كەمترە، نەخێر".


دڵنیایشی داوە لەوەی، "لێچوون و بەهەدەردان لە داهاتی سلێمانی هەیە و دەبێت بە باشی كۆی بكەنەوە، هەروەها تاوەكو ساڵی 2005 كە ئیدارە یەكی نەگرتووەتەوە، ئەم ناوچەیە لە بانی مەقانەوە قەسفی چەمچەماڵ و شوان و قادر كەرەم و تەكیەی جەباری كراوە، لە جەلەولا و خانەقین و سەعدیە كێشە هەبووە، مەرزەكانمان داخراون، تەنیا باشماخ و ئیبراهیم خەلیلمان هەبووە، فرۆكەخانە بەو كاراییەی ئێستا نەبووە و كارگۆكەی بەو شێوەیەی ئێستا نەبووە، ئەسڵەن وەبەرهێنان عەقارات بەو شێوەیەی ئێستا نەبووە، داهاتی ناوخۆ كەمبووە، خەڵك بەردەوام دامەزراوە، هیچ كەسێكیش خانەنشین نەكراوە، بۆچی بودجە بەشیكردووە؟ ئەی ئێستا ئەو هەموو سەرچاوەیەمان هەیە، هەرچی سەرچاوەی پارە پەیداكردن لە جیهاندا هەیە ئێمە هەمانە، یەك شتمان نییە، پارەمان نییە، كەواتە ئێمە كێشەی ئەقڵمان هەیە، كێشەی گیرفانمان نییە".

 


پارێزگاری سلێمانی پێشنیازی كرد:"حكومەتی هەرێمی كوردستان ئەنجوومەنێكی بیرمەندانی كوردستان دابمەزرێنێت،كۆمەڵێك دابنێن نە ئیمتیازاتیان بوێ نەپارە، بیر بۆ حكومەت بكەنەوە، دەبێت حكومەت گوێیان بۆ بگرێت، چونكە حكومەت سەرقاڵ بووە بە ئیدارەدانی قەیرانەوە، ئەم كابینەیە كابینەی قەیرانە، توانای بیركردنەوەی لاواز بووە، زۆرجار ئەوەندە بە خراپی دەست بۆ شتەكان دەبات، دەبێت پێی بڵێی چاكی مەكە با خراپ نەبێت. واتە بە قەیران قەیرانێكی دیكەت بۆ دروست دەكات".

 

لەبارەی سوودەكانی لامەركەزیەت، هەڤاڵ ئەبوبەكر رایگەیاند، "لامەركەزیەت وادەكات خزمەتگوزاری، وەبەرهێنان، داهات، شەفافیەت و لێپرسینەوە زیاد بێت، گەندەڵی و ساختەكاری و بەهەدەردان كەم ببێتەوە، هەست بەخۆت بكەی، كێبڕكێ لەنێوانی شارەكاندا دروست ببێت، سوود لەو سەمایە سرووشتی و مرۆییە وەرگریت كە لە ناوچەكەتدا هەیە، ئەمانەش وادەكەین پەیكەری هەرێمی كوردستان بەهێز بكەن، لەوانە دەسەڵاتداریێتی لاواز بكات، بەڵام دەوڵەتداری بەهێز دەكات".

 

هەروەها یەكێك لە گرفتەكانی بەردەم لامەركەزی وەك هەڤاڵ ئەبوبەكر ئەوەیە، "ئێستادا حیزبە سیاسییەكان، پەرلەمان، ئەنجوومەنی نوێنەران، ئەنجوومەنی پارێزگا و ئیدارە خۆجۆییەكان و هاووڵاتی و میدیا و دادگەكان بڕوایان بە لامەركەزی هەیە، بەڵام بە وەزیرەكانی هەموومان و ئەنجوومەنی وەزیرانمانەوە بڕوایان بە لامەركەزی نییە، ئەمەش گرفتەكەیە.. ئەوان پێیانوایە دەسەڵاتی وەزیر كەم دەبێتەوە دەدرێت بە هەڤاڵ، ئەو دەسەڵاتە نە بۆ منە نە هی ئەوە.. ئەمە ئیدارەدانی خەڵكە، نە من و نە ئەو لەو شوێنە نامێنینەوە".


هەڤاڵ ئەبوبەكر بڕوای وایە، "حكومەتی هەرێمی كوردستانیش لەنێوان لایەنە ساسییەكاندا گرفتیان هەیە، داهاتی فەرمی لە رێگەی حكومەت كۆدەكرێتەوە، ئەوانەی لە ئیدارەدان لە لایەنە سیاسییەكان لەو سێ لایەنە، نایانەوێت پارەی دەوڵەت بكەوێتە بەردەم لایەنە سیاسییەكان و ناوچەكەیان.. "من لێتان ناشارمەوە ئێمە لە سلێمانی داهاتمان زۆر، لە هەولێر 57٪ـی خەرج دەكرێت، بەڵام لە سلێمانی 43٪ـەكەی خەرج ناكرێت، ئێمە دەبێت راستگۆ بین. ئەو 43٪بە ژمارە بۆ خەزێنەی حكومەت دەگەڕێتەوە بە نەختینەیی ناگەڕێتەوە، دەكرێت وەكو هەولێر بخرێتە وەبەرهێنان و بووژانەوە، لەو پارەیەی كە لێرە هەیە 43٪ بۆ مووچە دەڕوات، كە لەوەیاندا قازانجمانە، كە مووچە دێت نەقسی هەیە، 57٪ی دراوە بە زۆنی ئەولا 43٪ی دراوە بە ئێمە، ئێستا لەمەیاندا ئێمە قازانجمانە 57٪ی ئەوان تەمویلی مووچەی پێدەكەن، 43٪ی ئێمە تەمویلی مووچەی پێدەكەین. بۆیە ئەگەر بەڕاستی دەست نەخەینە سەر برینەكان، ناگەینە ئەنجام".

 

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure