هێزى پێشمه‌رگه‌
298 جار بینراوە 18/2/2021 09:37 PM

فەرماندەیەکى پێشمەرگە: رێگە بە هیچ هێزێک نادەین، لە بیرە نەوتیەكان نزیک بێتەوە



سنور ميديا 

فەرماندەیەکی پێشمەرگە رایدەگەیەنێت، لە ئامادەباشیدان بۆ پاراستنی بیرە نەوتیەکان و ڕێگە بە هیچ هێزێک نادەن، لەو بیرە نەوتیانە نزیک بێتەوە.

 

لیوا عیرفان حەمەخان فەرماندەی سوپای گەرمیانی پارتی، کە هێزەکانیان بە شێک لە بیرە نەوتیەکانی گوێر دەپارێزن بەدەنگی ئەمریكای وتووە، "هێزەکانمان هەمیشە لە ئامادەباشیدان، نەک تەنها بۆ پاراستنی بیرە نەوتیەکان، بەڵکو ئەو ناوچانە سەنگەری ئێمەن و خوێنمان تێدا ڕشتووە، هەر جوڵەیەک هەبێت، ئێمە ئامادەین بۆ بەرپەرچەدانەوەی."

 

جەختکردنەوەی فەرماندەکەی پێشمەرگە لە پاراستنی بیرە نەوتیەکانی گوێر، لەکاتێکدایە بەپێی هەندێک زانیاری، هێزەکانی حەشدی شەعبی لەو سنورە، چاویان بڕیووەتە بیرە نەوتیەکان.

 

ئەوبەرپرسەی هێزەكانی پێشمەرگە باسیلەوەشكردووە، 12کم لەنێوان ئێمە و هێزە عێراقیەکان ناوچەی موحەرەمەیە، نە ئەوان بۆیان هەیە بێنە ئەو ناوچەیە، نە ئێمەش تەجاوز دەکەین."

 

چەند شەوێک لەمەوبەر شاری هەولێر موشەک بارانکرا، دواتر بەرپرسانی پارتی، حەشدی شەعبیان بە ئەنجامدانی هێرشەکە تۆمەتبار کرد، جەختیانکردەوە هێرشبەرەکان لە سنوری گوێرەوە دزەیانکردووە، لەو بارەیەوە لیوا عیرفان حەمەخان، ڕوونیکردەوە هێرشبەرەکان سەنگەری پێشمەرگەیان نەشکاندووە، ڕەنگە وەکو مەفرەزەی پارتیزانی دزەیانکردبێتە سنورەکە، وتی"گواستنەوەی چەک و تەقەمەنی و ساروخ، نازانم لە چ قۆڵێکەوە هێنراوە، ڕەنگە خەڵکیان هەبێت ، یاخود مەسەلەکە دەستی گەورەی لەپشتەوە بێت، بەڵام لەهەموو دونیا، مەفرەزەی پارتیزانی دەتوانێت بجوڵێت، تەنانەت لە وڵاتە زلهێزەکانیش."

 

دەربارەی جوڵەی هێزەکانی حەشدی شەعبی بەرامبەر سەنگەرەکانیان، فەرماندەکەی پێشمەرگە دەڵێت"ئەو هێزانەی بەرامبەر ئێمەن، جوڵەی ئەوتۆیان نیە، ڕەنگە لە سنوری قەرەچوغ و بەهۆی داعشەوە، جوڵەیان هەبێت."

 

لەبارەی جوڵەی چەکدارەکانی داعش لە سنوری هێزەکەی، ڕوونیکردەوە داعش مەفرەزەی چەکداریان لە ناوچەکەدا هەیە، بۆیە هێزەکانیان سەنگەر سازیان کردووە و ئامادەن بۆ وەڵام دانەوەی هەر هێرشێک، گەر بکرێتە سەریان.

 

زۆرترین خوێندراوە

  • یەک ڕۆژ
  • یەک هەفتە
  • یەک مانگ

بۆ زانینی سەرپێچی ئوتۆمبێلەکەت کلیک بکە

سلێمانی هەولێر دهۆک

ڕاپرسی

كام جۆری سیستەمی حوكمڕانی بۆ هەرێمی كوردستان دەگونجێت ؟




    
Copyright © 2015 Snur Media. Developed by Avesta Group and powered by Microsoft Azure